दास पन्नालाल
कलैया, १४ माघ।
बाराको परवानीपुर गाउँपालिका–१ रहरियाडीहमा भएको आमा–छोराको दोहोरो हत्याकाण्ड प्रेम सम्बन्धबाट उत्पन्न आपराधिक योजनाको परिणाम भएको प्रहरी अनुसन्धानबाट खुलेको छ। घटनामा संलग्न रहेको आरोपमा बुहारी र उनका प्रेमीलाई प्रहरीले पक्राउ गरेको छ।
प्रहरीका अनुसार २३ वर्षीया मनिता देवी मण्डलले आफ्ना प्रेमी धमेन्द्र महतोसँग मिलेर सासु सुमित्रा देवी मण्डल र श्रीमान् रामेश्वर मण्डलको धारिलो हतियार प्रयोग गरी हत्या गरेको प्रारम्भिक अनुसन्धानबाट पुष्टि भएको छ।
सोही आक्रमणमा परिवारका अन्य दुई सदस्य गम्भीर घाइते भएका छन्। घाइते हुनेमा मृतकका श्रीमान् जगरुप महतो र नन्द रिना कुमारी मण्डल रहेका छन्। उनीहरूको परवानीपुरस्थित एल.एस. न्यूरो अस्पतालमा उपचार भइरहेको छ।
बाराका प्रमुख प्रहरी उपरीक्षक नरेन्द्र कुँवरका अनुसार घटनाको मुख्य योजनाकार मनिता देवी मण्डल नै रहेको देखिएको छ। उनका प्रेमी धमेन्द्र महतो वैदेशिक रोजगारीका लागि दुबईमा कार्यरत थिए। उनी माघ १२ गते नेपाल फर्किएपछि मानितासँग भेटघाट गरी हत्या योजना कार्यान्वयन गरेको खुलेको प्रहरीले जनाएको छ।
घटनापछि प्रहरीले मानितालाई घरमैबाट र धमेन्द्रलाई वीरगञ्जबाट पक्राउ गरेको हो। हाल दुवै जनालाई हिरासतमा राखी थप अनुसन्धान भइरहेको छ।
यो जघन्य घटनाले स्थानीय समाजलाई स्तब्ध बनाएको छ भने पारिवारिक सम्बन्धभित्र लुकेको द्वन्द्व र असहिष्णुताले कसरी भयावह अपराध निम्त्याउन सक्छ भन्ने गम्भीर प्रश्न खडा गरेको छ।
प्रहरीका अनुसार अनुसन्धानका थप तथ्य सार्वजनिक हुने क्रम जारी रहनेछ।
