५ माघ,माघ । कलैया उप महानगरपालिका–१ का वडा सदस्य तथा स्थानीय तहमा सक्रिय युवा नेता शशि दासले आफ्नो पदबाट राजीनामा दिएका छन्। नेकपा (एमाले) बाट निर्वाचित दासले आगामी फागुन २१ गते हुने प्रतिनिधिसभा निर्वाचनमा उम्मेदवारी दिने तयारीस्वरूप वडा सदस्य पद त्यागेको बताएका छन्।
दास हाल समुन्नत नेपाल पार्टीको केन्द्रीय सदस्यसमेत भइसकेका छन्। उनले बारा निर्वाचन क्षेत्र नम्बर ३ बाट प्रतिनिधिसभा सदस्य पदमा उम्मेदवारी दिने निर्णय भएको जानकारी दिएका छन्। पार्टीको नीति, सिद्धान्त र जिल्लाको समग्र विकासका लागि नयाँ जिम्मेवारी लिन चाहेकाले स्थानीय तहको पदबाट अलग भएको उनको भनाइ छ। शशि दासले कलैया उपमहानगरपालिकाका नगर प्रमुखसमक्ष नगर कार्यपालिका सदस्य पदबाट औपचारिक रूपमा राजीनामा बुझाएका हुन्। स्थानीय तहमा रहँदा शिक्षा, स्वास्थ्य, खानेपानी तथा आधारभूत पूर्वाधार विकासका क्षेत्रमा आफूले सक्रिय भूमिका निर्वाह गरेको उल्लेख गर्दै उनले जनताको विश्वास र समर्थनका आधारमा अगाडि बढ्ने प्रतिबद्धता व्यक्त गरेका छन्।
उनको राजीनामासँगै कलैया उपमहानगरपालिका वडा नम्बर १ मा वडा सदस्य पद रिक्त भएको छ। नगरपालिकाका अनुसार रिक्त पद पूर्तिका लागि कानुनी प्रक्रिया अनुसार आवश्यक प्रक्रिया अगाडि बढाइनेछ।
शशि दासको राजीनामालाई स्थानीय राजनीतिमा महत्वपूर्ण घटनाका रूपमा हेरिएको छ। आगामी प्रतिनिधिसभा निर्वाचन नजिकिँदै जाँदा उनको कदमले बारा–३ को राजनीतिक समीकरणमा नयाँ बहस र चासो थपिएको छ।
