Author: दाश पन्न्नालाल

काठमाडौं, १४ चैत – पूर्वप्रधानमन्त्री केपी शर्मा ओलीलाई पक्राउ गरेपछि प्रहरीले उनकै निजी सवारी साधन प्रयोग गरी काठमाडौं प्रहरी परिसर लगेको छ।
भक्तपुरको गुण्डुस्थित निवासबाट शुक्रबार बिहान नियन्त्रणमा लिइएका ओलीलाई प्रारम्भिक सोधपुछका लागि सीधै प्रहरी परिसर पुर्‍याइएको हो।
प्रहरी स्रोतका अनुसार, पक्राउ गर्नुअघि नै उनको निवास वरपर सुरक्षा व्यवस्था कडा बनाइएको थियो। पक्राउ पुर्जी लिएर पुगेका प्रहरीसँग ओलीले केहीबेर कानुनी परामर्श गरेका थिए। त्यसक्रममा उनले आफूविरुद्धको कारबाही ‘प्रतिशोधपूर्ण’ भएको प्रतिक्रिया दिएका छन्।
यसै प्रकरणमा तत्कालीन गृहमन्त्री रमेश लेखकलाई पनि सोही दिन बिहान भक्तपुरबाट पक्राउ गरिएको छ।
दुवै नेतामाथि भदौ २३ गते भएको ‘जेनजी आन्दोलन’का क्रममा १९ जनाको मृत्यु भएको घटनामा संलग्न रहेको आरोप छ। सो घटनाबारे बनेको जाँचबुझ आयोगको प्रतिवेदन र पीडित परिवारको जाहेरीका आधारमा अनुसन्धान अघि बढाइएको प्रहरीले जनाएको छ।
उक्त प्रतिवेदनले ओली, लेखक तथा तत्कालीन प्रहरी प्रमुखमाथि मुलुकी अपराध संहिता २०७४ को दफा १८२ अन्तर्गत ‘हेलचेक्र्याइँ गरी ज्यान मार्ने’ कसुरमा अनुसन्धान गर्न सिफारिस गरेको थियो।
नवनियुक्त प्रधानमन्त्री बालेन्द्र शाह नेतृत्वको मन्त्रिपरिषद्ले प्रतिवेदन कार्यान्वयन गर्ने निर्णय गरेलगत्तै गृहमन्त्री सुदन गुरुङले अनुसन्धान प्रक्रिया अगाडि बढाउन निर्देशन दिएका थिए।
प्रहरीले ‘जरुरी पूर्जी’का आधारमा पक्राउ गरेको जनाएको छ। अब कानुनी प्रक्रिया अनुसार ओलीलाई स्वास्थ्य परीक्षणपछि २४ घण्टाभित्र जिल्ला अदालत काठमाडौंमा उपस्थित गराइनेछ।
यो घटनाले नेपालको राजनीतिक तथा कानुनी इतिहासमा महत्वपूर्ण मोड ल्याएको छ, जहाँ पूर्वकार्यकारी प्रमुख नै ज्यानसम्बन्धी फौजदारी मुद्दामा अनुसन्धानको दायरामा आएका छन्।

ब्रेकिङ न्युज…..

पन्नालल दास—

काठमाडौं/ बारा, १४ चैत – ‘जेनजी आन्दोलन’ दमनसम्बन्धी घटनामा अनुसन्धान अघि बढाउँदै प्रहरीले पूर्व गृहमन्त्री रमेश लेखकलाई पक्राउ गरेको छ।
काठमाडौं उपत्यका अपराध अनुसन्धान कार्यालयका अनुसार, लेखकलाई भक्तपुरको कटुन्जेस्थित निजी निवासबाट शुक्रबार बिहान नियन्त्रणमा लिइएको हो।
नयाँ सरकार गठन भएसँगै बसेको पहिलो मन्त्रिपरिषद् बैठकले गौरीबहादुर कार्की नेतृत्वको जाँचबुझ आयोगको प्रतिवेदन कार्यान्वयन गर्ने निर्णय गरेपछि पक्राउ प्रक्रिया अघि बढाइएको हो।
उक्त निर्णयपछि गृहमन्त्री सुदन गुरुङले सुरक्षा निकायका प्रमुखहरूसँग लगातार छलफल गरेका थिए। प्रहरीले कानुनी प्रक्रिया स्पष्ट पार्न सरकारसँग लिखित निर्देशन मागेपछि मध्यरातमा कानुन मन्त्रालयका सचिव पाराश्वर ढुंगानालाई प्रहरी प्रधान कार्यालय बोलाइएको थियो।
ढुंगानाले आवश्यक कानुनी कागजात तयार गरेपछि प्रहरीले ‘जरुरी पक्राउ पुर्जी’ जारी गर्दै लेखकलाई नियन्त्रणमा लिएको हो।
गत भदौ २३ र २४ गते भएको आन्दोलनमा भएको मानव क्षतिको विषयमा गठित आयोगले तत्कालीन प्रधानमन्त्री केपी शर्मा ओली, गृहमन्त्री लेखक तथा प्रहरी प्रमुख चन्द्रकुवेर खापुङमाथि फौजदारी अनुसन्धान सिफारिस गरेको थियो।
मुलुकी फौजदारी संहिता २०७४ को दफा १८१ र १८२ अन्तर्गत ‘लापरबाही तथा हेलचेक्र्याइँबाट ज्यान गएको’ कसुरमा कारबाही गर्न आयोगले सुझाव दिएको थियो।
यद्यपि सरकारबाट प्रतिवेदन औपचारिक रूपमा सार्वजनिक नगरिए पनि यसको अंश सञ्चारमाध्यममा आइसकेको छ। सोही आधार र पीडित पक्षको जाहेरीलाई टेकेर अनुसन्धान प्रक्रिया अघि बढाइएको जनाइएको छ।
प्रहरीले अब लेखकलाई कानुनी प्रक्रिया अनुसार अदालतमा उपस्थित गराउने तयारी गरेको छ।

पन्नालाल दास—

काठमाडौं, १४ चैत २०८२ – पूर्वप्रधानमन्त्री केपी शर्मा ओलीलाई प्रहरीले पक्राउ गरेको छ। शुक्रबार राति भक्तपुरको गुण्डुस्थित निवासबाट प्रहरीले उनलाई नियन्त्रणमा लिएको हो।
काठमाडौं उपत्यका अपराध अनुसन्धान कार्यालय टेकुका एसएसपी सन्तोष खड्का नेतृत्वको टोली ओली निवासमा प्रवेश गरी उनलाई पक्राउ गरेको स्रोतले जनाएको छ। प्रहरीका अनुसार, उनलाई पक्राउ गर्न टोली रातिदेखि नै परिचालन गरिएको थियो।
यसै घटनामा ओली नेतृत्वको तत्कालीन सरकारका गृहमन्त्री रमेश लेखकलाई पनि आज बिहान भक्तपुरकै कुटुन्जेस्थित निवासबाट पक्राउ गरिएको छ।
भदौ २३ गते भएको ‘जेनजी आन्दोलन’का क्रममा १९ जनाको ज्यान गएको घटनामा संलग्न रहेको आरोपमा अनुसन्धानका लागि दुवै जनालाई पक्राउ गरिएको हो।
तीन दिनअघि सार्वजनिक भएको जाँचबुझ आयोगको प्रतिवेदनले पूर्वप्रधानमन्त्री ओली, तत्कालीन गृहमन्त्री लेखक तथा पूर्वप्रहरी महानिरीक्षक चन्द्रकुवेर खापुङसहितका व्यक्तिमाथि मुलुकी अपराध संहिता २०७४ को दफा १८२ अन्तर्गत ‘हेलचेक्र्याईं गरी ज्यान मार्न नहुने’ कसुरमा कारबाही गर्न सिफारिस गरेको थियो। उक्त कसुरमा ३ वर्षसम्म कैद र ३० हजार रुपैयाँसम्म जरिवानाको व्यवस्था छ।
नवनियुक्त प्रधानमन्त्री बालेन्द्र शाहको नेतृत्वमा बसेको मन्त्रिपरिषद बैठकले आयोगको प्रतिवेदन कार्यान्वयन गर्ने निर्णय गरेको थियो। त्यसलगत्तै गृहमन्त्री सुदन गुरुङले घटनाको अनुसन्धान अघि बढाउन प्रहरीलाई निर्देशन दिएका थिए।
महान्यायाधिवक्ता कार्यालय स्रोतका अनुसार, पीडित परिवारले दर्ता गराएको जाहेरीका आधारमा पक्राउ प्रक्रिया अघि बढाइएको हो। प्रहरी स्रोतका अनुसार, ओलीलाई पक्राउ गर्दा अदालतबाट पूर्वअनुमति नलिई ‘जरुरी पूर्जी’का आधारमा नियन्त्रणमा लिइएको हो।
प्रहरीले अब उनलाई स्वास्थ्य परीक्षणपछि हिरासतमा राख्नेछ र २४ घण्टाभित्र जिल्ला अदालत काठमाडौंमा उपस्थित गराउने प्रक्रिया अघि बढाउने जनाएको छ।
नेपालको इतिहासमा मुलुकको कार्यकारी प्रमुख रहिसकेको व्यक्ति ज्यानसम्बन्धी फौजदारी मुद्दामा पक्राउ परेको यो पहिलो घटना भएको बताइएको छ।

१३ चैत्र, काठमाडौं । बालेन्द्र शाह ले आज नेपालको प्रधानमन्त्रीका रूपमा पद तथा गोपनीयताको शपथ लिएका छन्। रामचन्द्र पौडेल ले शीतल निवास मा आयोजित विशेष समारोहबीच उनलाई शपथ गराएका हुन्।

यसअघि राष्ट्रपतिले नेपालको संविधान २०७२ को धारा ७६(१) अनुसार प्रतिनिधिसभामा बहुमत प्राप्त दलका नेताको हैसियतमा शाहलाई प्रधानमन्त्रीमा नियुक्त गरेका थिए। संविधान जारी भएपछि पहिलोपटक उक्त धाराबाट सरकार गठन भएको हो भने मधेशी समुदायका व्यक्ति प्रधानमन्त्री बनेको पनि यो पहिलोपटक हो।

बालेन्द्र शाह काठमाडौं महानगरपालिकाको मेयर पदबाट राजीनामा दिएर फागुन २१ को निर्वाचनमा सहभागी भएका थिए। झापा क्षेत्र नं. ५ बाट उनले पूर्वप्रधानमन्त्री केपी शर्मा ओली लाई झण्डै ५० हजार मतान्तरले पराजित गर्दै प्रतिनिधिसभा सदस्यमा विजयी भएका थिए। पहिलोपटक सांसद बनेकै छोटो समयमै उनी प्रधानमन्त्री बन्न सफल भएका छन्।
🔹 मन्त्रिपरिषद् गठन
शपथसँगै प्रधानमन्त्री शाहले सानो आकारको मन्त्रिपरिषद् गठन गरेका छन्। उनले प्रधानमन्त्रीसँगै रक्षा र उद्योग मन्त्रालयको जिम्मेवारी आफैंले सम्हालेका छन्।
मन्त्रिपरिषद्का सदस्यहरू यसप्रकार छन्—
स्वर्णिम वाग्ले — अर्थमन्त्री
सुधन गुरुङ — गृहमन्त्री
शिशिर खनाल — परराष्ट्रमन्त्री
सुनिल लम्साल — भौतिक पूर्वाधार तथा यातायात, सहरी विकास
विराजभक्त श्रेष्ठ — ऊर्जा, जलस्रोत तथा सिँचाइ
खड्कराज पौडेल — पर्यटनमन्त्री
सस्मित पोखरेल — शिक्षा, विज्ञान तथा प्रविधि र युवा तथा खेलकुद
निशा मेहता — स्वास्थ्य तथा जनसंख्या
विक्रम तिमिल्सिना — सञ्चारमन्त्री
प्रतिभा रावल — सामान्य प्रशासन
दीपक साह — श्रम, रोजगार
सोविता गौतम — कानुनमन्त्री
गीता चौधरी — कृषि तथा पशुपन्छी विकास, वन तथा वातावरण
सीता वादी — महिला, बालबालिका मन्त्री
🔹 नयाँ अध्यायको सुरुवात
नयाँ प्रधानमन्त्रीको शपथसँगै देशमा नयाँ सरकार औपचारिक रूपमा गठन भएको छ। युवा नेतृत्वको रूपमा हेरिएका बालेन्द्र शाह को नेतृत्वमा अब सरकारको कामकारबाही कसरी अघि बढ्छ भन्ने विषयमा व्यापक चासो देखिएको छ।

काठमाडौं, चैत १२ — नवनिर्वाचित प्रतिनिधिसभा सदस्यहरूले आज पद तथा गोपनीयताको शपथ लिएका छन्।
बिहीबार सिंहदरबार स्थित नयाँ संसद भवनको बहुउद्देश्यीय हलमा आयोजित कार्यक्रममा प्रतिनिधिसभाका ज्येष्ठ सदस्य अर्जुननरसिंह केसी ले सांसदहरूलाई शपथ गराएका हुन्।
सङ्घीय संसद् सचिवालयका अनुसार कुल ४७ जना सांसदले नेपालीबाहेक अन्य भाषामा शपथ लिएका छन्। नेपालको संविधान को धारा ९९ तथा धारा ९१ को उपधारा (५) र प्रतिनिधिसभा सदस्य निर्वाचन ऐन, २०७४ को दफा ७५ अनुसार पद तथा गोपनीयताको शपथ लिने कानुनी व्यवस्था रहेको छ।
गत फागुन २१ गते सम्पन्न प्रतिनिधिसभा सदस्य निर्वाचनको परिणामअनुसार राष्ट्रिय स्वतन्त्र पार्टी ले सबैभन्दा धेरै १८२ सिट जितेको छ। त्यसैगरी नेपाली कांग्रेस ले ३८, नेकपा एमाले ले २५, नेपाल कम्युनिस्ट पार्टी ले १७, श्रम संस्कृति पार्टी ले ७ र राष्ट्रिय प्रजातन्त्र पार्टी ले ५ सिट प्राप्त गरेका छन्।
नवनिर्वाचित सांसदहरूको शपथसँगै अब प्रतिनिधिसभाको आगामी बैठक तथा संसदीय प्रक्रिया औपचारिक रूपमा अघि बढ्ने अपेक्षा गरिएको छ।