कलैया, चैत १७। बाराका युवाहरूले बालेन सरकार र सुरक्षा निकायको सहयोगमा कलैयामा मोटरसाइकल र्याली आयोजना गरेका छन्।
र्याली जेनजी युथ अफ बाराका संयोजक सौरभ पाण्डेको नेतृत्वमा गरिएको थियो, जसमा युवाहरूले सरकारको सकारात्मक काम र सुशासनको महत्त्व जनसमुदायमा प्रचार गरेका छन्।
र्याली दरबार रोडबाट सुरु भएर भरत चोक, बालमन्दिर, श्री ३ चन्द्र रोड, देवकोटा चोक, गुप्ता पेट्रोल पम्प हुँदै बजार क्षेत्रमा सम्पन्न भएको थियो। सहभागीहरूले सडकमा जनतालाई अभिवादन गर्दै, “भ्रष्टाचारी जेलमा, नयाँ सरकारको काम सफल” लगायतका नारासहित जनचेतना अभिवृद्धि गर्ने प्रयास गरेका थिए।
जेनजी युथ संयोजक पाण्डेले भने, “यो र्यालीले युवाहरूमा राष्ट्रप्रतिको जिम्मेवारी र भ्रष्टाचारविरुद्ध आवाज उठाउने चेतना जगाउँछ। हामी सबैले सरकार र सुरक्षा निकायसँग सहकार्य गर्दै देशमा शान्ति कायम राख्नुपर्छ।”
उक्त कार्यक्रममा सौरभ चौगाई, सुरज साह, संजय चौधरी, प्रशान्त यादव, आनन्द गुप्ता, रोहित पटेल, अशोक पाण्डे, सुरज खनाल, लालु गुप्ता र एजाजुल अंसारी लगायतका जेनजी युथका पदाधिकारीहरूको सक्रिय सहभागिता रहेको थियो।
आयोजकहरूले बताएअनुसार, र्यालीले शान्ति, सुशासन र भ्रष्टाचारविरुद्ध युवाको भूमिकालाई समुदायमा प्रष्ट रुपमा देखाउन महत्वपूर्ण योगदान पुर्याएको छ।
