जनकपुरधाम, जेठ १२ — मधेश प्रदेश सरकारका नवनियुक्त मन्त्री लखनदासले खेलकुद तथा समाज कल्याण मन्त्रालयको पदभार ग्रहण गरेका छन्। मन्त्रिपरिषद् विस्तारसँगै नियुक्त भएका उनले मंगलबार मन्त्रालय पुगेर औपचारिक रूपमा कार्यभार सम्हालेका हुन्।
पदभार ग्रहणपछि मन्त्री दासले खेलकुद क्षेत्रको समग्र विकास, युवा सशक्तीकरण तथा समाज कल्याणका कार्यक्रमलाई प्रभावकारी रूपमा कार्यान्वयन गर्ने प्रतिबद्धता व्यक्त गरे।
उनले प्रदेशका खेलाडी, युवा तथा पिछडिएका समुदायको हितलाई केन्द्रमा राखेर काम गर्ने बताए।
उनले खेलकुद पूर्वाधार विस्तार, युवामैत्री कार्यक्रम सञ्चालन तथा सामाजिक विकाससँग सम्बन्धित योजनालाई प्राथमिकतामा राखिने उल्लेख गरे। साथै, मन्त्रालयलाई परिणाममुखी ढंगले अघि बढाउँदै प्रदेशमा सकारात्मक परिवर्तन ल्याउने लक्ष्य रहेको बताए।
पदभार ग्रहण कार्यक्रममा राजनीतिक प्रतिनिधि, मन्त्रालयका कर्मचारी तथा शुभेच्छुकहरूको उपस्थिति रहेको थियो। उपस्थितहरूले मन्त्री दासलाई सफल कार्यकालको शुभकामना दिएका थिए।
मन्त्री दासको आगमनसँगै मधेश प्रदेशको खेलकुद तथा समाज कल्याण क्षेत्रमा नयाँ ऊर्जा थपिने अपेक्षा गरिएको छ।
