बारा, १४ माघ।
बाराको परवानीपुर गाउँपालिका–१ रहरियाडिहमा बुधबार बिहान भएको निर्मम हत्याकाण्डले सम्पूर्ण गाउँ शोक र त्रासमा डुबेको छ। अज्ञात समूहले धारिलो हतियार प्रयोग गरी आमा–छोराको विभत्स हत्या गरेका छन्।
ज्यान गुमाउनेमा ५२ वर्षीया सुमित्रा देवी मण्डल र उनका २४ वर्षीय छोरा रामेश्वर मण्डल रहेका छन्। सोही आक्रमणमा परिवारका अन्य तीन सदस्य गम्भीर घाइते भएका छन्। घाइते हुनेहरूमा मृतकका श्रीमान जगरुप मण्डल र छोरी रिना कुमारी रहेका छन्।
घाइतेहरूको परवानीपुरस्थित एल.एस. न्यूरो अस्पतालमा उपचार भइरहेको छ। चिकित्सकका अनुसार उनीहरूको अवस्था चिन्ताजनक रहेको छ।
घटनापछि जिल्ला प्रहरी कार्यालय बाराले घटनास्थल सिल गरी अनुसन्धान तीव्र बनाएको छ। प्रहरी नायब उपरीक्षक (DSP) विजयराज पाण्डेका अनुसार अपराधी पत्ता लगाउन प्रदेश प्रहरी कार्यालय जनकपुरबाट तालिमप्राप्त कुकुर झिकाई सूक्ष्म अनुसन्धान सुरु गरिएको छ।
यस हृदयविदारक घटनाले स्थानीय बासिन्दालाई स्तब्ध बनाएको छ। शान्त गाउँमा यति निर्मम अपराध भएपछि स्थानीयमा सुरक्षा प्रति गम्भीर प्रश्न उठेको छ।
यसैबीच, नेकपा एमालेका केन्द्रीय सदस्य तथा निर्वाचन क्षेत्र नं. ४ का प्रत्यासी नेता कृष्ण कुमार श्रेष्ठ (किसान) ले घटनाप्रति गहिरो दुःख व्यक्त गरेका छन्। उनले मृतक परिवारप्रति समवेदना प्रकट गर्दै दोषीलाई तत्काल पहिचान गरी कडाभन्दा कडा कानुनी कारबाही गर्न सरकारसँग माग गरेका छन्।
साथै, घाइतेहरूको उपचारमा कुनै पनि लापरबाही नगर्न प्रशासनलाई आग्रह गरेका छन्।
प्रहरीका अनुसार अनुसन्धान जारी रहेको छ भने दोषी चाँडै सार्वजनिक गरिने विश्वास व्यक्त गरिएको छ।
