कांग्रेस विशेष महाधिवेशनका लागि प्रतिनिधि दर्ता प्रक्रिया सुरु भृकुटीमण्डपमा तयारी तीव्र, उद्घाटन आजै

२७ पुस,काठमाडौं । नेपाली कांग्रेसको विशेष महाधिवेशनका लागि प्रतिनिधिहरूको नाम दर्ता प्रक्रिया आज बिहानदेखि सुरु भएको छ। भृकुटीमण्डपमा आयोजना हुने महाधिवेशनलाई लक्षित गर्दै महाधिवेशन स्थलको मूल प्रवेशद्वार नजिकै स्थापना गरिएको स्टलबाट दर्ता कार्य अघि बढाइएको हो।
व्यवस्थापन सचिवालयका संयोजक मनोजमणि आचार्यका अनुसार प्रतिनिधिले नाम दर्ता गर्न परिचय खुल्ने सरकारी कागजात र एकप्रति पासपोर्ट साइजको फोटो अनिवार्य रूपमा पेश गर्नुपर्नेछ। नाम दर्ता शुल्क एक हजार रुपैयाँ तोकिएको छ।
बिहान ८ बजेदेखि दर्ता सुरु गर्ने तयारी भए पनि प्राविधिक व्यवस्थापनका कारण केही ढिलाइ भएको आयोजकले जनाएको छ। अहिले महाधिवेशन स्थल पुगेका प्रतिनिधिहरूले क्रमशः दर्ता गराई परिचयपत्र (कार्ड) लिने क्रम जारी छ।
महाधिवेशनको उद्घाटन कार्यक्रम आज मध्याह्न १२ बजे हुने तयारी छ। उद्घाटनअघि काठमाडौं उपत्यकाका विभिन्न छ स्थानबाट जुलुस निकालेर प्रतिनिधि तथा कार्यकर्ताहरू भृकुटीमण्डप पुग्ने कार्यक्रम तय गरिएको छ।
विशेष महाधिवेशनको उद्घाटन सत्रको सभापतित्व काठमाडौँ जिल्ला सभापति सबुज बानियाँले गर्नेछन् भने उद्घाटनपछि सुरु हुने बन्द सत्रको अध्यक्षता पार्टीका ज्येष्ठ महाधिवेशन प्रतिनिधिले गर्ने व्यवस्था गरिएको छ।
पार्टी विधानको धारा १७(२) अनुसार पार्टीका करिब ५४ प्रतिशत महाधिवेशन प्रतिनिधिहरूको हस्ताक्षरका आधारमा विशेष महाधिवेशनको माग अघि बढाइएको हो। सोही अनुरोधअनुसार महामन्त्रीद्वय गगनकुमार थापा र विश्वप्रकाश शर्माको पहलमा महाधिवेशन आयोजना गरिएको जनाइएको छ।
यद्यपि, पार्टीको संस्थापन पक्षले यस विशेष महाधिवेशनलाई अस्वीकार गर्दै आएको छ, जसका कारण कांग्रेसभित्रको आन्तरिक राजनीतिक बहस थप चर्किएको छ।
आइतबारदेखि सुरु भएको विशेष महाधिवेशन सोमबारसम्म सञ्चालन हुने कार्यक्रम रहेको आयोजकले जनाएको छ।