Author: दाश पन्न्नालाल
-
सिमामा सर्वसाधारणलाई दुःख नदिन डिआईजी थपलियाको निर्देशन
६ बैशाख, वीरगञ्ज — मधेस प्रदेशका प्रहरी प्रमुख गोविन्द थपलिया ले सीमा नाकाहरूमा सर्वसाधारणलाई अनावश्यक दुःख नदिन मातहतका निकायलाई कडा निर्देशन दिएका छन्।
डीआईजी थपलियाले घरायसी प्रयोजनका लागि ल्याइने सामान्य सामानमा प्रहरी वा अन्य सम्बन्धित पक्षबाट अनावश्यक हैरानी दिने काम तुरुन्त बन्द गर्न स्पष्ट रूपमा निर्देशन दिएका हुन्। उनले सीमाक्षेत्रमा शान्ति–सुरक्षा कायम राख्नुका साथै नागरिकमैत्री व्यवहारलाई प्राथमिकतामा राख्नुपर्नेमा जोड दिएका छन्।
उनका अनुसार नियम कार्यान्वयन आवश्यक भए पनि त्यसका नाममा सर्वसाधारणको दैनिक जीवनमा अनावश्यक असर पर्न नदिन संवेदनशील ढंगले काम गर्नुपर्नेछ। सीमा क्षेत्रमा खटिएका सुरक्षाकर्मीले व्यवहारिक र जिम्मेवार ढंगले काम गर्नुपर्ने उनको भनाइ छ।
पछिल्ला दिनमा सीमा नाकाहरूमा भन्सार कडाइका कारण सर्वसाधारणले दुःख पाएको गुनासो बढ्दै गएको सन्दर्भमा डीआईजी थपलियाको यो निर्देशनलाई अर्थपूर्ण रूपमा हेरिएको छ। -
वीरगञ्जमा सडक विस्तार : १२ सय संरचना जोखिममा, १२ घण्टे सूचनापछि चल्दै डोजर
सरोज दास…
वीरगञ्ज, ६ वैशाख — झण्डै १३ वर्षदेखि अन्योलमा रहेको वीरगञ्जको मुख्य सडक विस्तार कार्य आइतबारबाट औपचारिक रूपमा सुरु गरिएको छ। सर्वोच्च अदालतको आदेशपछि अघि बढाइएको अभियानअन्तर्गत स्थानीय प्रशासनले १२ घण्टे सूचना जारी गर्दै बिहानैदेखि डोजर परिचालन गरेको हो।
यस अभियानका कारण करिब १,२०० भन्दा बढी घरटहरा प्रत्यक्ष प्रभावित हुने अनुमान गरिएको छ। छोटो सूचनापछि गरिएको कारबाहीका कारण धेरै स्थानीयवासीले आफ्नो सामानसमेत सुरक्षित गर्न नपाएको गुनासो गरेका छन्। विशेष गरी घण्टाघर आसपासका क्षेत्रमा डोजर चल्न थालेपछि स्थानीयमा भागदौड मच्चिएको थियो।
प्रभावितहरूले कम्तीमा ३ महिना समय दिनुपर्ने माग राख्दै आएका छन् भने प्रशासनले भने तत्कालै संरचना हटाउन दबाब दिएको देखिएको छ। कतिपय व्यवसायीहरूले लाखौँ रुपैयाँ बराबरको क्षति भएको दाबी गरेका छन्।
राजनीतिक तथा सामाजिक क्षेत्रबाट पनि यस कदमप्रति तीव्र प्रतिक्रिया आएको छ। पूर्वमेयर विजयकुमार सरावगीले १५ दिनको समय दिनुपर्नेमा १२ घण्टामै कारबाही गर्नु अन्यायपूर्ण भएको बताएका छन्। त्यस्तै, अजय द्विवेदीले सीमांकन र नापजाँचबिनै गरिएको कारबाहीलाई “हुकुमी शैली” भन्दै आलोचना गरेका छन्।
दीर्घकालीन रूपमा सहरको पूर्वाधार सुधारका लागि सडक विस्तार आवश्यक मानिए पनि कार्यान्वयनको तरिकाले गम्भीर प्रश्न उठाएको छ।विशेषज्ञहरूका अनुसार, विकाससँगै उचित मुआब्जा, पुनःस्थापना र पर्याप्त पूर्वसूचना अनिवार्य हुन्छ, अन्यथा यस्ता आयोजनाले सामाजिक असन्तोष बढाउने जोखिम रहन्छ।
-
बारामा आर्थिक गणना सुरु, “सही तथ्याङ्कले नै अर्थतन्त्रको यथार्थ देखाउँछ” — अधिकारी राजेश दास
५ वैशाख, बारा। राष्ट्रिय आर्थिक गणना २०८२ अन्तर्गत बारा जिल्लामा स्थलगत तथ्याङ्क संकलन कार्य वैशाख २ गतेदेखि सुरु भएको छ। जिल्ला आर्थिक गणना कार्यालय, बाराका आर्थिक गणना अधिकारी राजेश दासले यो गणना देशको वास्तविक आर्थिक अवस्था पहिचान गर्ने महत्वपूर्ण आधार भएको बताएका छन्।
उनका अनुसार “अर्थतन्त्र मापनका लागि आर्थिक गणना” भन्ने मूल नारासहित सञ्चालन गरिएको यस कार्यक्रमले उद्योग, व्यापार, सेवा क्षेत्र, रोजगारी अवस्था र उत्पादनसम्बन्धी यथार्थ तथ्याङ्क संकलन गर्नेछ। “सही तथ्याङ्ककै आधारमा देशको आर्थिक नीति र योजना निर्माण हुने भएकाले यो गणना अत्यन्त महत्वपूर्ण छ,” दासले भने।
दासका अनुसार बारा जिल्लामा गणना कार्यलाई प्रभावकारी बनाउन तालिमप्राप्त जनशक्ति परिचालन गरिएको छ, जसले व्यवसाय तथा प्रतिष्ठानमै पुगेर तथ्याङ्क संकलन गरिरहेको छ। साथै, गणनालाई सहज बनाउन स्थानीय तह र सरोकारवालासँग समन्वय गर्दै अघि बढिएको उनले जानकारी दिए।
उनले संकलित विवरणको गोपनीयताबारे पनि स्पष्ट पारे। “गणनामा संकलन गरिने व्यक्तिगत वा व्यावसायिक विवरणहरू तथ्याङ्क ऐन, २०७९ अनुसार पूर्ण रूपमा गोप्य रहनेछन्। ती विवरणहरू केवल सांख्यिकीय प्रयोजन र योजना निर्माणका लागि मात्र प्रयोग हुन्छन्,” उनले भने।
यसपटक अनलाइन प्रणालीमार्फत पनि विवरण भर्न सकिने व्यवस्था गरिएको उल्लेख गर्दै दासले व्यवसायी तथा उद्यमीलाई सक्रिय सहभागिताका लागि आग्रह गरे। “ई-सेन्सस प्लेटफर्ममार्फत स्वयं विवरण भर्न सकिने सुविधा छ, जसले गणनालाई अझ प्रभावकारी बनाउँछ,” उनले बताए।उनका अनुसार आर्थिक गणनाबाट प्राप्त तथ्याङ्कले देशको कुल गार्हस्थ उत्पादन (जीडीपी) अनुमानलाई मजबुत बनाउने, नीति निर्माणमा सहयोग गर्ने र लगानी तथा रोजगारी सिर्जनामा मार्गनिर्देशन गर्नेछ।
दासले सबै उद्योगी, व्यवसायी तथा सरोकारवालालाई सही र पूर्ण विवरण उपलब्ध गराई आर्थिक गणनामा सहयोग गर्न आग्रह गर्दै भने, “यो केवल सरकारी कार्यक्रम मात्र होइन, देशको आर्थिक भविष्यसँग जोडिएको साझा जिम्मेवारी हो।”
