सभामुखमा डीपी अर्याल निर्विरोध
२० चैत, काठमाडौं — प्रतिनिधिसभाको सभामुख पदमा डीपी अर्याल निर्विरोध भएका छन्। यद्यपि, उनको औपचारिक घोषणा भने आगामी प्रतिनिधिसभा बैठकमा गरिनेछ।
सभामुख पदका लागि शुक्रबार बिहान ११ बजेदेखि दिउँसो २ बजेसम्म मनोनयन दर्ताको समय तोकिएको थियो। सो अवधिमा अर्यालको मात्र उम्मेदवारी दर्ता भएपछि उनी निर्विरोध चयन भएका हुन्।
प्रतिनिधिसभा नियमावली–२०७९ को नियम ७ अनुसार सभामुख पदमा एक जनाको मात्र उम्मेदवारी परेमा समर्थक सदस्यले प्रस्ताव प्रस्तुत गरेपछि बैठकको अध्यक्षता गर्ने व्यक्तिले निर्विरोध निर्वाचित भएको घोषणा गर्ने व्यवस्था छ। सो घोषणा अब बस्ने प्रतिनिधिसभाको बैठकमा गरिनेछ, जुन आगामी आइतबारका लागि तय गरिएको छ।
संसदमा राष्ट्रिय स्वतन्त्र पार्टी को स्पष्ट बहुमत रहेका कारण अन्य दलहरूले सभामुख पदमा उम्मेदवारी नदिएको बताइएको छ। २७५ सदस्यीय प्रतिनिधिसभामा रास्वपाका १८२ सांसद छन्। त्यस्तै नेपाली कांग्रेस का ३८, नेकपा एमाले का २५, नेपाल कम्युनिस्ट पार्टी का १७, श्रम संस्कृति पार्टी का ७ तथा राष्ट्रिय प्रजातन्त्र पार्टी का ५ सांसद रहेका छन्।
संवैधानिक व्यवस्था अनुसार अब उपसभामुखको निर्वाचन प्रक्रिया सभामुखले तोकेको मिति र समयमा हुनेछ।
Leave a Reply