सरोज कुमार–
१५ चैत्र, कलैया (बारा) । नेपाल कम्युनिष्ट पार्टी (एमाले)ले केन्द्रीय सर्कुलरअनुसार बाराको कलैयामा विरोध प्रदर्शन गर्दै जिल्ला प्रशासन कार्यालयमा ज्ञापनपत्र बुझाएको छ।
जिल्ला अध्यक्ष अध्यानन्द पाण्डेयको नेतृत्वमा पार्टी कार्यालयबाट सुरु भएको विरोध जुलुस भरत चोक हुँदै जिल्ला प्रशासन कार्यालय पुगेको थियो। जुलुसका क्रममा सरकारविरुद्ध चर्को नाराबाजी गरिएको थियो।
प्रदर्शनमा केन्द्रीय नेता बलबिर चौधरी, प्रदेश कमिटी सचिव मनोज पौडेल, पूर्व प्रदेशसभा सदस्य सुन्दर विश्वकर्मा, युवा संघका केन्द्रीय नेता रामजी यादव तथा युवा नेता पुरुषोतम साहलगायतका नेता–कार्यकर्ताको उल्लेख्य सहभागिता रहेको थियो।
जिल्ला प्रशासन कार्यालयअगाडि केही समय तनावपूर्ण अवस्था समेत सिर्जना भएको थियो। प्रदर्शनकारीहरूले सरकारको वर्तमान गतिविधिप्रति असन्तुष्टि जनाउँदै विभिन्न नाराबाजी गरेका थिए।
कार्यक्रमको अन्त्यमा पार्टी नेताहरूले प्रशासनमार्फत सरकारलाई ध्यानाकर्षण गराउने उद्देश्यले विरोधपत्र बुझाएका छन्।
