दास पन्नालाल–
१५ चैत्र, काठमाडौं । मुलुकका तीन पूर्वप्रधानमन्त्री शेरबहादुर देउवा, केपी शर्मा ओली र पुष्पकमल दाहालको सम्पत्तिबारे औपचारिक छानबिन प्रक्रिया अघि बढाइएको छ।
सम्पत्ति शुद्धीकरण विभागले केन्द्रीय अनुसन्धान ब्यूरो (सीआईबी)लाई पत्राचार गरेपछि अनुसन्धान प्रक्रिया सुरु भएको हो। स्रोतका अनुसार विभागको सिफारिसपछि तीनै नेताको सम्पत्ति विवरण, स्रोत र वित्तीय कारोबारमाथि अध्ययन थालिएको छ।
यसैक्रममा, कांग्रेस नेता तथा पूर्वऊर्जा मन्त्री दीपक खड्कालाई आइतबार पक्राउ गरिएको छ। सीआईबीका एआईजी डा. मनोज केसीले उनलाई सम्पत्ति शुद्धीकरणसम्बन्धी अनुसन्धानका लागि नियन्त्रणमा लिइएको पुष्टि गरेका छन्। तीन पूर्वप्रधानमन्त्रीसम्बन्धी विषयमा भने उनले विस्तृत टिप्पणी गर्न चाहेनन्।
यसअघि ‘जेनजी’ आन्दोलनका क्रममा शेरबहादुर देउवाको निवासमा नगद भेटिएको विषय सार्वजनिक भएको थियो। त्यसपछि सम्बन्धित निकायले देउवा निवासमा पुगेर मुचुल्का उठाएको थियो। त्यस्तै पुष्पकमल दाहालका पारिवारिक सदस्यको निवास र केपी शर्मा ओलीसँग सम्बन्धित स्थानहरूमा समेत प्रारम्भिक अनुसन्धान गरिएको थियो।
उक्त प्रारम्भिक छानबिनकै आधारमा अहिले अनुसन्धानलाई थप तीव्र बनाइएको जनाइएको छ। उच्च तहका राजनीतिक नेतृत्वमाथि छानबिन अघि बढेसँगै यस विषयले राष्ट्रिय राजनीतिक वृत्तमा व्यापक चासो उत्पन्न गरेको छ।
