संवाहक
७ मंसिर , कलैया— बाराका प्रमुख जिल्ला अधिकारी वसन्त अधिकारीले महागढीमाई नगरपालिका बरियारपुरमा मंसिरमा शुरु भएको गढीमाई पञ्चवर्षिय मेलामा ड्रोन उडान गर्न निषेध गरिएको बताएका छन्।
ड्रोन जनित मानवरहित हवाई उपकरण उडान सम्बन्धी कार्यविधि, २०७५ बमोजिम कुनै व्यक्ति वा संस्थाले ड्रोन क्यामेरा उडान गर्ने भएमा जिल्ला प्रशासन कार्यालयबाट अनुमति लिई ड्रोन क्यामेरा उडान गर्ने सक्ने प्रावधान रहेको छ ।
बारा जिल्लाको महागढीमाई नगरपालिका वडा नं. १ बरियारपुरमा अवस्थित श्री गढीमाई मन्दिरमा २०८१ मंसिर १ गते देखी मसान्त सम्म गढीमाई मेला लाग्ने शुरु भएको छ। सो मेला अवधिभर ड्रोन उडानमा अनुमति विना प्रतिबन्ध लगाएको छ।
पञ्चवर्षिय गढीमाई मेला, २०८१ लाई लक्षित गरी कुनै पनि व्यक्ति, संघ संस्थाले जिल्ला प्रशासन कार्यालयको अनुमति बेगर ड्रोन क्यामेरा उडान गर्न नपाइने प्रशासन कार्यालय (स्थानीय प्रशासन तथा शान्ति सुरक्षा शाखा) बारा, कलैयाले जनाएको छ।
यदि यस सूचनाको अवज्ञा गरी कोही कसैले ड्रोन क्यामेरा उडान गरेको देखिएमा वा पाईएमा उक्त ड्रोन क्यामेरा जफत गरिने सम्बन्धित ड्रोन क्यामेराका धनीलाई प्रशासन कार्यालयले आज सरोकारवालाको लागि एक सुचना जारी गरि जानकारी गराईएको हो।
सूचना अटेर गरि उलंघन गर्ने उडानमा संलग्न व्यक्तिलाई प्रचलित कानुन बमोजिम कारवाही हुने प्रमुख जिल्ला अधिकारी बसन्त अधिकारीद्धारा हस्ताक्षरित सुचनामा उल्लेख गरिएको छ।
