कलैया, साउन ९ — मदन भण्डारी फाउण्डेसन बारा जिल्ला कमिटीले आगामी असोज १० गते जिल्ला अधिवेशन गर्ने निर्णय गरेको छ। शनिबार कलैयामा सम्पन्न पूर्ण विस्तारित बैठकले अधिवेशनको मिति तय गर्दै आवश्यक तयारी तत्काल सुरु गर्ने निर्णय गरेको हो।
जिल्ला अध्यक्ष रुष्तम अन्सारीको अध्यक्षतामा बसेको बैठकमा संगठन सुदृढीकरण, सदस्यता विस्तार, संगठनको वर्तमान अवस्था तथा आगामी कार्ययोजनाबारे छलफल भएको थियो। बैठकमा फाउण्डेसनका केन्द्रीय सदस्य अरबिन्द सिंह प्रमुख अतिथिका रूपमा सहभागी थिए।
कार्यक्रममा केन्द्रीय सदस्य किशोर शर्मा, मधेश प्रदेश अध्यक्ष राज महम्मद राय, प्रदेश कोषाध्यक्ष अशोक तिवारी, प्रदेश सदस्य दीपक चौधरी, प्रभु प्रसाद साह, जिल्ला उपाध्यक्ष पनलाल कुशवाहा, उपसचिव शशिभूषण चौधरी, तेजनारायण चौधरी लगायत जिल्ला तथा प्रदेश तहका पदाधिकारी र सदस्यको उपस्थिति रहेको थियो।
बैठकमा वक्ताहरूले जननेता मदन भण्डारीले अघि सारेको जनताको बहुदलीय जनवाद (जबज) लाई जनस्तरसम्म पुर्याउन संगठनलाई थप सक्रिय बनाउनुपर्ने धारणा राखेका थिए।
युवाको सहभागिता बढाउने, वैचारिक प्रशिक्षण सञ्चालन गर्ने तथा सामाजिक उत्तरदायित्वका कार्यक्रम विस्तार गर्नुपर्नेमा जोड दिइएको थियो।
बैठकले अधिवेशन सफल बनाउन विभिन्न उपसमिति गठन गर्ने, जिल्लाभरका सदस्यलाई परिचालन गर्ने र संगठन विस्तार अभियानलाई तीव्र बनाउने निर्णयसमेत गरेको जनाएको छ।
बैठकको समापनमा अध्यक्ष अन्सारीले अधिवेशनलाई भव्य र व्यवस्थित बनाउन सबै सदस्य तथा शुभेच्छुकलाई सक्रिय भूमिका निर्वाह गर्न आग्रह गरे। उनले संगठनका उद्देश्य र सिद्धान्तलाई जनस्तरसम्म पुर्याएर सामाजिक रूपान्तरणमा फाउण्डेसनको भूमिका थप प्रभावकारी बनाउने बताए।
Leave a Reply