सर्लाही, साउन ९ — महोत्तरीको बर्दिबास क्षेत्रमा सञ्चालित होटल तथा खाद्य व्यवसायमा गरिएको संयुक्त अनुगमनका क्रममा खाद्य स्वच्छता र गुणस्तरमा गम्भीर लापरबाही भेटिएपछि पाँच व्यवसायलाई कुल रु. १ लाख ७० हजार जरिवाना गरिएको छ।
गृह, सञ्चार तथा कानून मन्त्री फकिरा महतोको अगुवाइमा जिल्ला प्रशासन कार्यालय, खाद्य प्रविधि तथा गुण नियन्त्रण कार्यालय, आन्तरिक राजस्व कार्यालय तथा घरेलु तथा साना उद्योग कार्यालयका प्रतिनिधिहरू सम्मिलित टोलीले शुक्रबार अनुगमन गरेको हो।
अनुगमनका क्रममा होटल विनायकमा खाना खुला रूपमा राखिएको, सरसफाइको अभाव रहेको तथा करिब २५० बोतल म्याद गुज्रिएका पेय पदार्थ फेला परेपछि रु. २० हजार जरिवाना गरिएको छ। फेला परेका सबै म्याद गुज्रिएका पेय पदार्थ नष्ट गरिएको जनाइएको छ।
त्यसैगरी होटल गुँजा गौरी डाँडामा म्याद गुज्रिएका खाद्य सामग्री, खुला रूपमा राखिएको खाना तथा लेबल नभएका घ्यूसहित विभिन्न सामग्री फेला परेपछि रु. २० हजार जरिवाना गरी बरामद सामग्री नष्ट गरिएको छ।
गौतम होटलमा सरसफाइको अवस्था कमजोर रहेको, कुहिएका फलफूल तथा तरकारी र म्याद गुज्रिएको मसला भेटिएपछि रु. १ लाख जरिवाना गरिएको छ।
साथै होटललाई सात दिनभित्र सुधार गर्न निर्देशन दिइएको छ। यस्तै होटल नव्यामा कुहिएका तरकारी, म्याद गुज्रिएको मैदा, पेय पदार्थ र अचार फेला परेपछि ती सामग्री नष्ट गरी रु. २० हजार जरिवाना गरिएको छ।
एभरेष्ट डेरी एण्ड स्वीट हाउसमा खाद्य सामग्रीको गुणस्तर सन्तोषजनक भए पनि आवश्यक कागजात अपूरो रहेको पाइएकाले रु. १० हजार जरिवाना गर्दै सचेत गराइएको छ।
अनुगमन टोलीले खाद्य व्यवसायीलाई स्वच्छता तथा खाद्य सुरक्षा मापदण्डको पूर्ण पालना गर्न निर्देशन दिएको छ। आगामी दिनमा यस्ता कमजोरी दोहोरिए थप कडा कानुनी कारबाही गरिने चेतावनी समेत दिइएको छ।
Leave a Reply