कलैया साउन ११ — बाराको कलैया उपमहानगरपालिका–१७ ब्रह्मपुरीस्थित भित्री सडकमा मोटरसाइकल दुर्घटना हुँदा एक किशोरको मृत्यु भएको छ भने अर्का एक जना घाइते भएका छन्।
आइतबार बिहान करिब ८ः२५ बजे भवानीपुरबाट ब्रह्मपुरीतर्फ जाँदै गरेको ना ४५ प २१७७ नम्बरको मोटरसाइकल अनियन्त्रित भई सडक किनारमा रहेको विद्युत् पोलमा ठोक्किएको प्रहरीले जनाएको छ।
दुर्घटनामा मोटरसाइकल चालक कलैया उपमहानगरपालिका–३ निवासी अजित मन्सुरका १५ वर्षीय छोरा सोयब मन्सुर गम्भीर घाइते भएका थिए। मोटरसाइकलको पछाडि सवार सोही क्षेत्रका साबिर हुसेन अन्सारीका १५ वर्षीय छोरा साहिद अन्सारी को हातमा सामान्य चोट लागेको छ।
दुवै घाइतेलाई उपचारका लागि प्रादेशिक अस्पताल कलैया लगिएको थियो। उपचारकै क्रममा बिहान करिब ९ बजे चिकित्सकले ईसीजी परीक्षणपछि सोयब मन्सुरलाई मृत घोषणा गरेको प्रहरीले जनाएको छ।
घटनाको जानकारी प्राप्त भएपछि अस्थायी प्रहरी पोस्ट गंगापुरबाट प्रहरी सहायक निरीक्षक महमद हुसेन देवानको नेतृत्वमा टोली घटनास्थल पुगेको थियो। दुर्घटनाग्रस्त मोटरसाइकल प्रहरीले नियन्त्रणमा लिएको छ।
मृतकको शव प्रादेशिक अस्पताल कलैयामै राखिएको छ भने घटनाबारे थप अनुसन्धान भइरहेको प्रहरीले जनाएको छ।
Leave a Reply