बारा,१६ जेठ । गणतन्त्र दिवसको अवसर पारेर नेपाल पत्रकार महासंघ मधेश प्रदेश समितिको प्रादेशिक भवन निर्माणका लागि शुक्रबार जनकपुरधाममा शिलान्यास गरिएको छ।
जनकपुरधाम उपमहानगरपालिका–४ स्थित महासंघको भवन मधेश प्रदेश सरकारका गृह, सञ्चार तथा कानुनमन्त्री फकिरा महतो र नेपाल पत्रकार महासंघ मधेश प्रदेश अध्यक्ष श्याम बन्जाराले संयुक्त रूपमा शिलान्यास गरेका हुन्।
शिलान्यास कार्यक्रमलाई सम्बोधन गर्दै मन्त्री महतोले महासंघको प्रादेशिक कार्यालयलाई सुविधा सम्पन्न भवनका रूपमा विकास गर्ने प्रतिबद्धता जनाए। उनले भवन निर्माणका लागि महासंघ, अर्थ मन्त्रालय र गृह, सञ्चार तथा कानुन मन्त्रालयबीच समन्वय गरी आगामी बजेटमार्फत आवश्यक रकम व्यवस्थापन गरिने बताए।
नेपाल पत्रकार महासंघ मधेश प्रदेश अध्यक्ष श्याम बन्जाराले अग्रज पत्रकारहरूले देखेको सपना साकार पार्ने दिशामा भवन निर्माण अभियान अघि बढाइएको बताए। उनले नेपालमै पहिलो पटक प्रदेश समितिको आफ्नै भवन निर्माणको ऐतिहासिक कार्य सुरु भएको उल्लेख गर्दै छिट्टै आधुनिक र सुविधा सम्पन्न भवन निर्माण सम्पन्न हुने विश्वास व्यक्त गरे।
उनका अनुसार महासंघको निर्वाचनका क्रममा गरिएको प्रतिबद्धता अनुसार नै भवन निर्माण प्रक्रिया अघि बढाइएको हो। प्रारम्भिक चरणमा दुई कोठे संरचनाबाट काम सुरु गरिएको र क्रमशः विस्तार गर्दै आधुनिक भवन निर्माण गरिने जानकारी दिइएको छ।
कार्यक्रममा नेपाल पत्रकार महासंघका केन्द्रीय लेखा समिति संयोजक केसी लामिछाने, स्वतन्त्र सेनानी राम भरत, केन्द्रीय सदस्य राजेश कर्ण, आम सञ्चार प्राधिकरण मधेश प्रदेश अध्यक्ष जितेन्द्र सिंह खड्का, मिडिया काउन्सिलका कार्यवाहक अध्यक्ष बन्दना झा लगायतको उपस्थिति रहेको थियो। कार्यक्रमको सहजीकरण महासंघका महासचिव शैलेन्द्र महतोले गरेका थिए।
