मुन्ना कुमार–
१४ चैत्र, काठमाडौं — संघीय प्रशासनिक केन्द्र सिंहदरबार आसपास सुरक्षा व्यवस्था ‘हाइ अलर्ट’ मा राखिएको छ। नेकपा एमालेका नेता–कार्यकर्ताले विरोध प्रदर्शन सुरु गरेपछि राजधानीको अवस्था केही तनावपूर्ण बनेको छ।
विशेषगरी माइतीघर मण्डला–नयाँ बानेश्वर क्षेत्र प्रदर्शनका कारण प्रभावित भएको छ। भीड व्यवस्थापन र सम्भावित झडप रोक्न ठूलो संख्यामा प्रहरी तथा अन्य सुरक्षाकर्मी परिचालन गरिएको छ।
प्रदर्शन चलिरहँदा संवेदनशील मानिएका सरकारी तथा प्रशासनिक क्षेत्रहरूमा निगरानी बढाइएको छ। सुरक्षाकर्मीले अवस्थालाई नियन्त्रणमा राख्न रणनीतिक रूपमा तैनाथी बढाएका छन्।
पछिल्लो राजनीतिक घटनाक्रमअन्तर्गत एमालेसँग सम्बन्धित नेताहरू पक्राउ परेपछि पार्टीले विरोध कार्यक्रम थालेको हो। सोही कारण राजधानीका प्रमुख राजनीतिक केन्द्रहरूमा चहलपहलसँगै तनाव पनि बढेको देखिएको छ।
यसअघि भदौ २३ र २४ गतेको आन्दोलनमा पनि यस्तै परिस्थिति सिर्जना भएको थियो। हालको अवस्था पनि त्यसैको झल्को दिने गरी विकसित हुँदै गएको सुरक्षा निकायको आकलन छ।
