दास पन्नालाल
६ असाेज,बारा — बारा प्रहरीले करिब साढे २ क्विन्टल लागुऔषध गाँजा सहित अमलेखगंजमा एकजनालाई नियन्त्रणमा लिएको छ। बा २ ख ९५६९ नम्बरको मिनी ट्रकबाट २८ पोका गाँजा बरामद गरेको प्रहरीले जनाएको छ।
आइतबार दिउँसो १ बजेको समयमा इलाका प्रहरी कार्यालय अमलेखगंजले आफ्नो चेकपोइन्टमा मकवानपुरबाट वीरगन्जतर्फ आउँदै गरेको उक्त ट्रकलाई रोकेर जाँच गर्दा ट्रकको छतमा फल्स बटम बनाई त्रिपालले छोपिएको अवस्थामा गाँजा फेला परेको थियो।
प्रहरीका अनुसार, बरामद गरिएको गाँजाको कुल तौल २ सय ३६.७५० किलोग्राम रहेको छ। प्रहरीले लागुऔषध र मिनी ट्रकसहित चालकलाई नियन्त्रणमा लिएको छ। पक्राउ पर्ने रुम्बा मकवानपुरको कैलाश गाउँपालिका–१० का ३८ वर्षीय रमेश रुम्बा हुन्।
उनीमाथि थप अनुसन्धान भइरहेको इलाका प्रहरी कार्यालय अमलेखगंजले जनाएको छ। घटनाको थप अनुसन्धानका लागि इलाका प्रहरी कार्यालय सिमराबाट प्रहरी नायब उपरीक्षक (डीएसपी) वेद प्रकाश जोशीको कमान्डमा एक टोली खटिएको छ।
बारा प्रहरीका प्रहरी नायब उपरीक्षक संतोष तमाङले जनाएका छन्।
