पन्नालाल दास, बीरगञ्ज
२५ भदौ– पर्सा जिल्ला स्थित बीरगञ्ज कारागारमा कैदीबन्दीले नाराबाजी गर्दै सेल भित्रै तोडफोडमा उत्रेपछि स्थिति तनावग्रस्त बनेका थिए।
हिजो मध्य रातदेखि उनीहरूले जेन जीको प्रदर्शनले उत्पन्न देशको विषम परिस्थितिको असर छोपी जेलबाट भाग्न खोजेका थिए।
कैदीबन्दीहरूले झडपको स्थिति सिर्जना गरी एकजुट भई भित्रीका सेलहरू तोडफोड गर्नुका साथै भित्रीबाटै पछाडी पट्टीका दिवालमा सुरुङ पारी निस्कने प्रयास गरेका थिए।
देशभर विभिन्न कारागारमा यस्तै अवस्था छ भन्ने केहिबाट तोडफोड गरि जेल बाहिर निस्केका छन्।
जेलमा तोडफोड हुन थालेपछि जेल प्रशासनले जेलको तनावग्रस्त स्थिति काबु भन्दा बाहिर गएपछि नेपाली सेनालाई गुहारेका थिए।
स्थितिलाई नियन्त्रणमा लिन अश्रु ग्याँस प्रहार सँगै नेपाली सेनाले केही राउण्ड गोली हवाई फायर पछि पनि गोली चलाएका थिए। सोही क्रममा चार जना कैदी बन्दीहरू घाइते भए ।
घाइते कैदीबन्दीको हात र खुट्टामा गोली लागेको छ। घाइते हुनेमा विकाश- रुम्बा, राजा कुमार सोनि, संदिप चौधरी लागु औषध मुद्दामा र विशाल जैसवाल – जबरदस्ती करणी मुद्दामा चार जना जेल परेका छन्। घाइतेको उपचारपछि पुनः जेलमा सारिएको छ।
तोडफोड र भत्काइएका कोठा दिवाललाई तत्कालै मर्मत सम्भार गरि सुरक्षा व्यवस्था कडा पारिएको बताईएको छ।
