मोटरसाइकलको ठक्करबाट एकको मृत्यु, एक गम्भीर घाइते

बारा, साउन १० — बाराको करैयामाई गाउँपालिका–८ नरही चौकदेखि इटहर जाने सडकखण्डमा मोटरसाइकलको ठक्करबाट एक जनाको मृत्यु भएको छ भने अर्का एक जना गम्भीर घाइते भएका छन्।

प्रहरीका अनुसार साउन ९ गते राति करिब ११ बजे नम्बर नखुलेको मोटरसाइकलले पैदलयात्री दुई जनालाई ठक्कर दिएको थियो।

ठक्करबाट करैयामाई गाउँपालिका–८ निवासी करिब २५ वर्षीय उमेश साह सोनार र अर्का पवन साह सोनार गम्भीर घाइते भएका थिए।

घटनाको जानकारी प्राप्त हुनासाथ प्रहरी चौकी गंजभवानीपुरबाट प्रहरी नायब निरीक्षक बहादुर प्रसाद यादवको नेतृत्वमा टोली खटिई दुवै घाइतेको उद्धार गरी थप उपचारका लागि वीरगञ्जस्थित न्युरो अस्पताल पठाइएको थियो।

उपचारकै क्रममा उमेश साह सोनारको साउन १० गते बिहान करिब १ः२० बजे मृत्यु भएको प्रहरीले जनाएको छ। उनको शव हाल सोही अस्पतालमा राखिएको छ।

त्यसैगरी बारा विश्रामपुर गाउँपालिका–५ इटियाही निवासी करिब ४० वर्षीय पवन साह सोनारको टाउकोमा गम्भीर चोट लागेको छ। उनको न्युरो अस्पताल वीरगञ्जको सघन उपचार कक्ष (आईसीयू) मा उपचार भइरहेको प्रहरीले जनाएको छ।

दुर्घटनामा संलग्न मोटरसाइकल र चालक फरार रहेकाले खोजी तथा थप अनुसन्धान कार्य जारी रहेको जिल्ला प्रहरीका सुचना अधिकारी एवम् डिएसपी मीन बहादुर घलेले जनाएका छन्।