कलैया, जेठ १४ — मुस्लिम समुदायको महान् पर्व बकर इद (इदुल अजहा) आज बाराको कलैया,सुवर्ण गाँउपालिकाको पशुरामपुर भिस्वा , मुसहर्ना रौतहटको खाप घिउरा विरगञ्जको छपकैया सहित देशभर श्रद्धा, उल्लास र धार्मिक आस्थाका साथ मनाइएको छ।
बिहानैदेखि मस्जिद तथा इदगाहहरूमा मुस्लिम धर्मावलम्बीहरूको बाक्लो उपस्थिति देखिएको थियो। उनीहरूले सामूहिक रूपमा विशेष नमाज अदा गर्दै एक–अर्कामा शुभकामना साटासाट गरेका छन्। नमाजपश्चात् धार्मिक विधिअनुसार जायज जनावरको कुर्बानी दिइएको छ।
इस्लाम धर्ममा बकर इद त्याग, समर्पण र आस्थाको प्रतीकका रूपमा मनाइन्छ। धार्मिक मान्यताअनुसार हजरत इब्राहिमले अल्लाहको आदेशअनुसार आफ्ना पुत्र हजरत इस्माइललाई बलिदान दिन तत्पर हुँदा अल्लाहले त्यसको सट्टा दुम्बाको कुर्बानी स्वीकार गर्नुभएको सम्झनामा यो पर्व मनाउने गरिन्छ।
कलैयासहित देशका विभिन्न जिल्लामा रहेका मस्जिदहरूमा बिहानैदेखि भक्तजनको भीड लागेको थियो। काठमाडौँको नेपाली जामे मस्जिद, काश्मिरी मस्जिदलगायत प्रमुख धार्मिक स्थलहरूमा विशेष नमाज सम्पन्न भएको छ।
पर्वका अवसरमा परिवारजन तथा आफन्तबीच शुभकामना आदानप्रदान, मिठा परिकारको व्यवस्था तथा आपसी सद्भाव साटासाट गरिएको छ।
बकर इदको अवसरमा सरकारले आज देशभर सार्वजनिक बिदा दिएको छ। मुस्लिम समुदायले “ईद मुबारक” भन्दै उल्लासपूर्वक पर्व मनाइरहेका छन्।
