मुन्ना कुमार ,
२९ पुस, काठमाडौं — नेपाली कांग्रेसको विशेष महाधिवेशनले पार्टीभित्र लामो समयदेखि दबिएको शक्ति संघर्षलाई खुला राजनीतिक प्रतिस्पर्धामा रूपान्तरण गरेको छ। पार्टी संरचनात्मक सुधारका प्रस्ताव पारित भएसँगै अब कांग्रेसको भविष्य नेतृत्व चयनको निर्वाचन प्रक्रियामा प्रवेश गरेको छ।
महाधिवेशनस्थलमा मंगलबार साँझ महामन्त्रीद्वय गगन थापा र विश्वप्रकाश शर्माले प्रस्तुत गरेका पार्टी सुधारसम्बन्धी प्रस्तावहरू बहुमतले पारित भएपछि विशेष महाधिवेशन पक्षधरहरूले आफूहरू अब पछि नहट्ने स्पष्ट सन्देश दिएका छन्।
गगनलाई भावी नेतृत्वको औपचारिक प्रस्ताव
विशेष महाधिवेशनको बन्दसत्रमा महामन्त्री विश्वप्रकाश शर्माले गगन थापालाई पार्टीको भावी नेतृत्व र प्रधानमन्त्रीका रूपमा अघि सार्ने प्रस्ताव गरे। प्रस्तावलाई स्वीकार गर्दै थापाले पार्टीका सबै निर्णायक विषय अब “महाधिवेशनको हलबाटै टुंगिने” घोषणा गरे।
थापाले बाहिर भइरहेका सहमतिको प्रयास निष्कर्षमा नपुगेको जनाउँदै अब कुनै निर्णय वार्ताको नाममा रोकिन्न भन्ने संकेत गरे।
‘विद्रोहको महाधिवेशन’ भन्ने स्पष्ट सन्देश
महामन्त्री थापाले विशेष महाधिवेशनलाई सामान्य राजनीतिक अभ्यासभन्दा फरक, सुधारका लागि भएको विद्रोहको रूपमा व्याख्या गरे। उनले नेतृत्वका आकांक्षीहरूलाई तत्काल पदको होडभन्दा पार्टी बचाउने जिम्मेवारीलाई प्राथमिकता दिन अपिल गरेका छन्।
“यो छोटो अवधिको नेतृत्व हो, नियमित महाधिवेशनतर्फ पार्टी लैजाने जिम्मेवारी हो,” थापाको भनाइ थियो।
संस्थापनसँग संवाद टुटेन, तर सहमति पनि आएन
संस्थापन पक्ष, शेखर कोइराला समूह र विशेष महाधिवेशन पक्षधरबीच दिनभर संवाद भए पनि मूल विषयमा सहमति हुन सकेन। विशेष महाधिवेशन पक्षधरहरूले सभापति शेरबहादुर देउवाले पद छाड्नुपर्ने र महाधिवेशनलाई वैधानिक मान्नुपर्ने माग दोहोर्याए।
संस्थापन पक्ष भने विशेष महाधिवेशनलाई नै अवैधानिक ठान्दै आएको छ। यही कारण मंगलबारका लागि बोलाइएको केन्द्रीय समिति बैठक समेत औपचारिक रूपमा बस्न सकेन।
नेतृत्व चयनको प्रक्रिया सुरुसंवाद अनिश्चित बन्दै जाँदा विशेष महाधिवेशनले नेतृत्व चयनको निर्वाचन प्रक्रिया औपचारिक रूपमा अघि बढाएको छ। आकांक्षीहरूले फारम लिन सुरु गरिसकेका छन् भने बुधबार नेतृत्वबारे निर्णायक फैसला हुने अपेक्षा गरिएको छ।
महाधिवेशनस्थलमा “वार्ताको नाममा अल्झिनु हुँदैन” भन्ने नारासमेत उठेपछि नेतृत्व चयन नगरी कार्यक्रम टुंग्याउने सम्भावना लगभग समाप्त भएको देखिन्छ।विभाजनको रेखा प्रष्ट, कारबाहीको सम्भावनासंस्थापन पक्षभित्र विशेष महाधिवेशन आयोजक र अगुवामाथि अनुशासनात्मक कारबाहीको तयारी भइरहेको संकेत देखिएको छ। सहमति नजुटे आज राति वा बुधबार बस्ने बैठकबाट त्यससम्बन्धी निर्णय हुनसक्ने चर्चा छ।
निर्णायक घडी कांग्रेसको विशेष महाधिवेशन संवाद र समझदारीको चरण पार गरेर शक्ति परीक्षणको चरणमा प्रवेश गरिसकेको छ। बुधबार हुने नेतृत्वसम्बन्धी निर्णयले पार्टी एकतामा जाने कि औपचारिक विभाजनतर्फ धकेलिने भन्ने निर्धारण गर्नेछ।
