कलैया उपमहानगरले संस्थागत विद्यालयलाई छात्रवृत्ति विवरण पेश गर्न दिए निर्देशन

कलैया, साउन ९ – कलैया उपमहानगरपालिकाले आफ्नो क्षेत्रभित्र सञ्चालित सबै संस्थागत विद्यालयलाई छात्रवृत्ति प्राप्त गर्ने विद्यार्थीहरूको विवरण अनिवार्य रूपमा पेश गर्न निर्देशन दिएको छ।

उपमहानगरपालिकाको शिक्षा, युवा तथा खेलकुद शाखाले जारी गरेको पत्रअनुसार शिक्षा नियमावली, २०५९ (दशौं संशोधनसहित) को नियम १५७ बमोजिम संस्थागत विद्यालयहरूले कुल विद्यार्थी सङ्ख्याको १० प्रतिशत विद्यार्थीलाई छात्रवृत्ति उपलब्ध गराउनुपर्ने व्यवस्था रहेको छ।

नियमअनुसार उपलब्ध गराइने छात्रवृत्तिमध्ये कम्तीमा २० प्रतिशत छात्रवृत्ति दलित, गरिब, महिला, जनजाति तथा द्वन्द्वपीडित विद्यार्थीलाई प्राथमिकताका साथ प्रदान गर्नुपर्ने उल्लेख गरिएको छ।

उपमहानगरपालिकाले शैक्षिक सत्र २०८३ मा नियमबमोजिम छात्रवृत्ति पाएका विद्यार्थीहरूको विवरण निर्धारित ढाँचामा संकलन गरी आगामी साउन १५ गतेभित्र शिक्षा, युवा तथा खेलकुद शाखामा बुझाउन सबै संस्थागत विद्यालयलाई अनुरोध गरेको छ।

पत्रमा छात्रवृत्ति प्राप्त विद्यार्थीको नाम, अध्ययनरत कक्षा, अभिभावकको नाम, सम्पर्क नम्बर तथा छात्रवृत्तिको विवरण उल्लेख गरी पेश गर्न भनिएको छ।

शिक्षा, युवा तथा खेलकुद शाखाका प्रमुख राजिव कुमार यादव द्वारा हस्ताक्षरित उक्त पत्रमार्फत छात्रवृत्ति वितरण प्रक्रियालाई पारदर्शी, व्यवस्थित र प्रभावकारी बनाउन विवरण संकलन गर्न लागिएको जनाइएको छ।