रवि लामिछानेको मुद्दा : अब पूर्ण इजलासमा सुनुवाइ

काठमाडौं । रवि लामिछानेसँग सम्बन्धित मुद्दा संशोधन गर्ने निर्णयविरुद्ध परेको रिट अब सर्वोच्च अदालतको पूर्ण इजलासमा सुनुवाइ हुने भएको छ।
सर्वोच्च अदालतका न्यायाधीशद्वय विनोद शर्मा र अब्दुल अजीज मुसलमानको संयुक्त इजलासमा प्रारम्भिक सुनुवाइ भएको थियो। बहसपछि उक्त रिटलाई पूर्ण इजलासमा पठाउने आदेश भएको अदालत प्रशासनले जनाएको छ।
यसअघि पूर्वमहान्यायाधिवक्ता सविता भण्डारी बरालले केपी शर्मा ओली नेतृत्वको सरकारको समयमा लागेका सम्पत्ति शुद्धीकरण र संगठित अपराधसम्बन्धी मुद्दा फिर्ता गर्ने निर्णय गरेकी थिइन्। सोही निर्णयविरुद्ध विभिन्न कानुन व्यवसायीहरूले सर्वोच्च अदालतमा रिट दायर गरेका थिए।
रिट निवेदन दायर गर्नेमा युवराज पौडेल, वरिष्ठ अधिवक्ता दिनेश त्रिपाठी र अधिवक्ता आभास रेग्मी रहेका छन्।
कानुनी व्यवस्थाअनुसार, जटिल प्रकृतिका मुद्दा वा संयुक्त इजलासमा राय बाझिएको अवस्थामा त्यस्ता मुद्दा पूर्ण इजलासमा पठाइन्छ। अब उक्त मुद्दामा तीन सदस्यीय पूर्ण इजलासले अन्तिम सुनुवाइ गर्नेछ।