ज्ञान खबरको दोस्रो वार्षिक उत्सव सम्पन्न

२ माघ,कलैया । ज्ञान खबर दैनिकको दोस्रो वार्षिक उत्सव आज एक कार्यक्रमका बीच सम्पन्न भएको छ। कार्यक्रमको अवसरमा केक काटेर वार्षिक उत्सव मनाइएको हो।
वार्षिक उत्सव कार्यक्रममा प्रमुख अतिथि प्रेस चौतारी मधेश प्रदेशका महासचिव दिवाकर भण्डारीले ज्ञान खबर दैनिकको उत्तरोत्तर प्रगतिको कामना व्यक्त गरे। उनले निष्पक्ष र जिम्मेवार पत्रकारितामार्फत समाजलाई सुसूचित गर्न पत्रिकाले निरन्तर भूमिका खेलोस् भन्ने शुभेच्छा व्यक्त गरे।
यसैगरी नेपाल पत्रकार महासंघ बारा शाखाका उपाध्यक्ष पन्नालाल दासले ज्ञान खबर दैनिकको दोस्रो वार्षिक उत्सवको अवसरमा शुभकामना व्यक्त गर्दै दैनिक पत्रिका प्रकाशन गर्नु आफैंमा चुनौतीपूर्ण कार्य रहेको बताए। उनले विज्ञापनका नाममा कमिसनको गन्ध आउने प्रवृत्ति चिन्ताजनक रहेको उल्लेख गर्दै यसलाई सम्बन्धित सरोकारवालाले तत्काल बन्द गर्नुपर्ने आवश्यकता औंल्याए। यस्तो विकृतिको न्यूनिकरणका लागि नेपाल पत्रकार महासंघले पहल गर्ने प्रतिबद्धता पनि व्यक्त गरे।
कार्यक्रममा नेपाल पत्रकार महासंघका पूर्व उपाध्यक्ष राकेश पाण्डेले पनि ज्ञान खबर दैनिकको सफलताको कामना गर्दै पत्रकारितामा इमानदारी र व्यावसायिकताको आवश्यकता औंल्याए।
वार्षिक उत्सव कार्यक्रम सह–सम्पादक जिउत यादवको अध्यक्षतामा सम्पन्न भएको थियो भने कार्यक्रम सञ्चालन अनिल गौरवले गरेका थिए।
ज्ञान खबर दैनिकको प्रकाशन तथा सञ्चालन प्रकाशक अनिल गौरव, भोला पौडेल र जिउत यादवले संयुक्त रूपमा गर्दै आएका छन्।