३१ भदाै,बारा —  नेपाल पत्रकार महासंघ बाराले पत्रकार बसन्त लामामाथि मंगलवार केही अराजक व्यक्तिले कुटपिट गरेको घटनाप्रति महासंघको गम्भीर ध्यानाकर्षण भएको छ।

​महासंघले जारी गरेको विज्ञप्तिमा लामामाथि हत्याको मनसायले कुटपिट भएको उल्लेख छ। लामाका अनुसार बाराको निजगढ नगरपालिका वडा नम्बर १ मा रहेको बन्सथली हाट बजार नजिकै मोटरसाइकलमा आएका केही व्यक्तिले उनलाई कुटपिट गरेका छन्। कुटपिटबाट लामाको शरीरका विभिन्न भागमा चोट लागेको छ।

​घटनाको निन्दा र भर्त्सना गर्दै महासंघले दोषीलाई तत्काल पक्राउ गरी कडा कारबाही गर्न प्रशासनसँग माग गरेको छ।

प्रसारित र ​प्रकाशित समाचारप्रति असहमति भए खण्डन गर्ने कानुनी बाटो अपनाउनुको सट्टा पत्रकारमाथि नै हातपात गर्नु दुःखद भएको विज्ञप्तिमा उल्लेख छ।

​महासंघले पत्रकार र पत्रकारिताको सुरक्षा सुनिश्चित गरी स्वतन्त्र र निर्भयताका साथ पेशामा लाग्ने वातावरण बनाउन पनि सम्बन्धित निकायसँग आग्रह गरेको छ। साथै घाइते पत्रकार लामाको शीघ्र स्वास्थ्य लाभको कामना पनि गरेको छ।

​पत्रकार महासंघ बारा शाखाका सूचना अधिकारी तथा सहसचिव इन्दीप कोइरालाले जारी गरेको विज्ञप्तिमा यो घटनाले पत्रकारिता पेशाको सुरक्षामाथि प्रश्न उठाएको उल्लेख छ।